İsmayıllının Basqal kəndini məşhur və zəngin edən onun ipəyi və kəlağayısı olub. 1993-cü ildən burada kəlağayı sexi fəaliyyət göstərsə də, sonradan sex fəaliyyətini dayandırıb. Hazırda bir neçə Basqal sakini toplaşıb kiçik bir sex yaradaraq sakinlərin işləməsinə, kəlağayını növbəti nəsillərə ötürməsinə yardımçı olurlar.
Sexdə çalışan Abbasəli Talıbov deyir ki, əsl ipəyi tanımaq üçün onu yandırmaq lazımdır. “Əgər yanıb qurtarandan sonra toz halına gələcəksə, deməli, əsl ipəkdir. Digər hala gələnlər isə ipəyə edilmiş qatqılardır ki, bu da əsl ipək sayılmır”.
Bir kəlağayı bir neçə dəfə rənglənməyə göndərilir. Naxışından asılı olaraq 3 gündən 1 həftəyə qədər hazırlamaq olar. Elə buna görə hazırladığımız kəlağayılar digər baş örtüklərinə nisbətən baha satılır. “40-70 manat arası dəyişir” – deyir Abbasəli Talıbov.
