“Bu, pomidor deyil, kartofdu 2 manata. Bahadır…”
Baş nazirin müavini Əli Əhmədov bazardakı məhsulların bahalığından şikayətlənir. Piştaxtaların önünü gəzə-gəzə satıcılara qiymətlərə görə irad bildirir. Lakin bahalığın səbəbləri ilə bağlı heç nə soruşmur.
“Əli müəlim heç soruşmadı ki, bu qiymətlər niyə bahadır? Ancaq elə baxdı, dedi ki, bahadır… Qiymətlər ona görə artır ki, məhsul yoxdur. Baha gəlir, baha satırıq. Nə alıcıya sərfəlidir, nə satıcıya”- Əntiqə Qurbanova deyir.
Aqrar sektor üzrə mütəxəsis Vahid Məhərrəmov Əli Əhmədovun bazara gəlişini qiymət artımının yaratdığı sosial gərginlik ilə əlaqələndirir. Sitat:
“Baş nazir və nazir bazara çıxmamalıdır. Kəndliyə, fermerə dəstək verməli, inhisarçılığın və korrupsiyanın qarşısını almaq haqda düşünməlidirlər. Qeyri-peşəkarlar anlamır ki, kartofun qiymətinin yüksək olmasının səbəbini bazarda axtarmaq lazım deyil. Bazar istehsalın və monopoliyanın güzgüsüdür”.
Bəs Baş nazirin müavini Əli Əhmədovu hansı suallar maraqlandırmalı idi?
İqtisadçı Toğrul Maşallı qiymət artımına əsas səbəb kimi məhsulun əldən-ələ keçməsini göstərir.
Ekspert fermerlərin xarici bazara çıxışına qoyulan məhdudiyyətlərin də yerli bazarda qiymətləri artırdığını qeyd edir.
